ماني مثل ماكنت تزعل وراضـيك= ماهو بنا اللي ينثني ساعة ارضــاك
عواض الاول صار ذكرى بماضـيك= واللي مضى ماتنفعه قولة ارجــــاك
ماعاد تثّر قولـــة الله يخلــــيك= مادامنـي حطيت فالـــبال فــرقاك
ماجيتك اسرد كلمة الحب وارجيك= ولا اكتب احروف الغناوي على إشفاك
جيت اخذ اوراق القصايد وخلـيك=بالذّات ذيك القصـيده .. والــورق ذاك
حتى الرسايل هاتها من مخابيك= نويـت امـزّق مابقــى من بـقاياك
كويتني ون عاش ذالراس لكويك= وعلّـمك وش لـون تندار الافـلاك
ماتدري انه ضاع عمري وانا ابكيك= والمشكله مــابان بك كثـر مــاجاك
تطلب وقلبي بس ياخـذ ويعطيك=ولا وش اللي قد طلبته ولا اعـطاك
اجبرتني بالغصب .. بالقوه اجفيك= وانا لك الله ماعلى بالـي اجـفاك
لاكن ترا كثـرت علـيّه بلاويــك= انثـر ورودن لك وتنثــرلي اشواك
مدري تصنّعت الجفا والتصق فيك= ولا انتهجت الصد وغرورك اعـماك
ولا انت قصدك تيتم الحب بيدك= ولا بغيت اتشـــيل حبي ولا امـداك
اسمع ترا عندي نصيحه تصحّيك= ان كنت ماتعرف تصـاريف دنـياك
الصد ياخلي ترا الصـد يرمـــيك= احذر تصد وقلـــب خلك تمنّــاك
خذ هالنصيحه واستفد من خطاويك=ترا الليالي تقلب اصحابك اعـــداك