المستشارة

ياحاكمة الالمان في دار برلين
*** ياناعمة ياست يامستشاره

هتلر ذبح بيديه الوف وملايين
*** وتوقعوا محدن بيلحق غباره

حرباً قضت من خانة العسر واللين
*** وانهد هتلر وانمحت كل آثاره

وجيتي بحرباً خططوها الشياطين
*** تلبس ثياب المصلحة والتجاره

قلتي كلاماً وبعراض العناوين
*** في دبلوماسيه وخبث ومهاره

أزمة غذاء العالم سببها من اثنين
*** قل الزراعه واختلال الاداره

وحنا نصدر حسب وضع القوانين
*** ولابد نبقى دائماً بالصداره

وقودنا الحيوي صناعه وتوطين
*** على حساب النفط يبدا انتشاره

والعالم الثالث بلشنا من اسنين
*** وش هو لجل نرضى من اجله خساره

الصيني اللي خذ في اليوم كوبين
*** من الحليب وشب نار استعاره

والهندي اللي زاد بالرز صحنين
*** لابد ياكل باقتدار وشطاره

هذي لنا حنا هل الحسن والزين
*** زرقة عيون وطيب لون وشقاره!!!

صرنا ولا زلنا ونبقى سلاطين
*** والمجد ساير ماتوقف قطاره

هذا كلام الست (ميركل) وبعدين
*** وش عاد باقي للخطا واعتذاره !؟!

يامستشاره كل ذاللي تقولين
*** بكل اسف منطق شعوب الحضاره

انعومتك وامومتك جت بوجهين
*** عباره اتفسر بخبث العباره

كيد النساء واضح مايحتاج تبيين
*** وخبث السياسه ماخذته بجداره

نظرة كبر تنبان من لمحة العين
*** لو زاحمتها بسمة الاستعاره

انتم قسمتوا عالم الارض نصفين
*** نصفا يعيش ونصف ياكل يساره

عالم جنوب الارض مقصور الايدين
*** مستهلكاً تاره ومهلوك تاره

شبابهم ساروا بعزم المسنين
*** ومسنهم فاقد بقايا وقاره

من سنة التسعين لاعام الالفين
*** وحنا نطل بروسنا من جداره

ونعاون اليورو في السوق ونعين
*** ونرجي من اليورو يحقق شعاره

وجتنا البشاره واوصلوها المودين
*** ليت المودي مالفى بالبشاره

هذي العداوه مالفتنا من الحين
*** في ذاكرة ليل الزمان ونهاره

غزيتوا الاسلام من قبل حطين
*** (ريتشارد) (وفردريك) عثوا في دياره

وجيتوا مع (اللنبي) (وغورو) بغزوين
*** غزو الجيوش وغزو فكر الحضاره

ويوم انتفقتوا في جميع الميادين
*** حنا اتفقنا في مجال النعاره

اللي جمع شوراً وقوه وتمكين
*** يضحك على اللي مابعد شب ناره

واللي سلب منا العراق وفلسطين
*** والله ميعطينا الرغيف بحراره!!!!

يامستشاره قولك اللي تقولين
*** ذكرني بكلمة وزير التجاره

ثم انعزل من منصبه بعد شهرين
*** لكن من اللي يعزل المستشاره