بني مالك بجيلة

بني مالك بجيلة (http://www.banimalk.net/vb/index.php)
-   منتدى الدواوين الشعرية (http://www.banimalk.net/vb/forumdisplay.php?f=89)
-   -   ديوان الشاعر : [ عبدالله الساعدي ] ..!! (http://www.banimalk.net/vb/showthread.php?t=93388)

عبدالله الساعدي 26-12-2009 10:04

ديوان الشاعر : [ عبدالله الساعدي ] ..!!
 

بسم الله الرحمن الرحيم =
..............................................................................=
إخواني واخواتي يسرني أن اقدم لكن ديوان يحتوي على قصايدي =
وسوف اطلعكم على كل جديد =
وإن شاء الله يحوز على رضاكم واستحسانكم ويرضي ذائقتكم الشعرية =


عبدالله الساعدي 26-12-2009 13:41

هاجس شاعر



بسم الله الرحمن قدّام ما أقول القصيد = الواحد اللي ارواحنا في قبضته وادرى بها
سبحانه اللي مطّلع ومقسّم ارزاق العبيد = متعلياً فوق العروش اللي وسيع جنابها
واصلي اعلى المصطفى والمنذر بيوم الوعيد = اللي دعانا للهدى ورسالته نومن بها
قمت اتمثل بالمثل وابني مثايل من جديد = مثايلاً ما صاغها شاعر ولا حد جابها
تحيّر اذهان العقول اللي في الموقف تجيد= وتهد روس النايفة لا من نويت ابدى بها
وتشيّب الطفل الرضيع وتكسر القلب الشديد = ما تاخذ الإ الأولة يا سعد من يولى بها
بعض القصايد ما تقال ولا تذاع ولا تفيد= مثل البضاعة البايرة بارت على جلاّبها
لو كل يوم اعرض بها واسعارها ما عد تزيد=صديت عنها وابتعدت ولا حسبت حسابها
من قالها ما له مكان وما معه رأياً سديد= قصيدة ما ترقى بنا للمجد وش نبغى بها
والبعض منها وافيات وكل يوماً في مزيد=تحيي القلوب الميتة .. ترفع بقدر اصحابها
تضفي على الموقف حماس وتشعل النار الوقيد=مثل السيوف البارعة تقصف حدود نصابها
فعل الرجال الطيبة مثل القصور اللي تشيد=يا ويل من هو ذمها يا ويل من هو عابها
أفعالهم نسمع بها والله على قولي شهيد= مثل السيول الجايرة لا حدّرت باشعابها
تشهد لهم ماضي العصر ويشهد الماضي التليد= أهل الشرف وأهل المدوح اللي عريب أنسابها
ناساً على وضح النقا ينخاهم الحظ السعيد = لا جاء نهار المكربة ما عد نسي الإ بها
والإ الردي ما نامنه لو من قريب ومن بعيد= الشارة اللي شافها في خاطري ما صابها
إن عاش ما حد يذكره وإن ما اعدّه فقيد = في مقصده يخلق فتن ويقوم يفتح بابها
وأهل الردى ما يامنون وما لهم عماً وسيد=لو شابت حروف القوافي ما قريت كتابها
كم من رجالاً حاضرة ما تنطق الإ بالوكيد = وكم من رجالاً ميتة ما احياها طول اشنابها
هذي نهاية ما نقول وخاتمة هذا النشيد= عسى السنين المقبلة تخطيني قبضة نابها

عبدالله الساعدي 26-12-2009 13:50

ثلاث وصايا



صكات بقعاء من قساها يا خلايق نستدير=نرجع ورى مية قدم والسِبّة من صكاتها
نحمل لها بصدورنا كيداً وشراً مستطير=وهي تذوّقنا العنا وتزيد في طعناتها
اللي فهيم وينتبه يوقف مع الأول وأخير=ويرد خنجرها لها وارغم عليها سكاتها
يصبر على جور الليال ويجبر العظيم الكسير = لإن الليالي وين ذا يصبر على صفقاتها
واللي ترك بقعاء تحوم ويحسب إن العلم خير = جته الأمور المعظية والمتعبة وسواتها
يا عاقل احذر وافتهم من قبل ما عمرك يطير=لا تترك الدنيا ترّوح وأنت خذها هاتها
خذها ثلاث من الحِكم ما مثلها بأيّة نظير = اغلى كثير من الذهب والنقد وجنيهاتها
الأولة قارب خطاك وترّك الماضي المرير=عيش العمر ما دام لك ساعة بعد ما جاتها
اجبر زمانك بالغصوب يصير والإ ما يصير = لو طعت وقتك لانتهيت ورحت في طياتها
والثانية خاوي الفهيم اللي من اعلامه بصير = لا حوّلت روس الفتن صوبه بهرجة ماتها
يعرف يداوي الماكنة ما يترك الفرصة لغير=يوم إن بعض الناس باقي يا عرب باسباتها
إلى ابتسم من ساعته رد السعادة في صدير=واليا زعل مثل البحور الثايرة موجاتها
وابعد وجنّب عن ردياً لا يجار ويستجير=في وقت ما صان الرجال الإ يكن شيماتها
والثالثة خلك عزوم وفي مواقيفك جدير =واحسب حساب الواردة والصادرة وجهاتها
حذرى تروغ وتبتعد وتطيح في نار السعير = واللي انتزى جوف القبس بيذوق من لذعاتها
حذرى يضلّي موقفك ما اصغره في عين الطوير=وتروح عُرضة للهروج اللي عَوَج ميقاتها
ولا تسّمع للهروج اللي من اصوير وعوير =ما قصدهم غير الفتن والمشكلة واحياتها
يقولها اللي ما نقص قدره وميقافه قدير =ولا انتحى للهينة ويجوب في طرقاتها
وصلاة ربي ع الرسول اعداد همّالاً غزير=واعداد ما لاحت بروقاً بالسماء ضيّاتها

عبدالله الساعدي 26-12-2009 14:05

الغريب


مع غياب الشفق لاحت هموماً ترسم العــبـــرات = على وجه الغريب اللي فؤاده زادت أوجاعه
يلوح الضيق بعيونه وميقات السعــــــادة فــــات = تعلم يصنع الفرحة لأجل ما يكشف قناعـــــه
ظلام الليل وسكونه يجدد صــرخة الآهــــــــات = ويحكي قصة الواقع وكيف الناس خداعـــــة
وجودي ع الغريب اللي على حد المخاطــر بات = يشوف الناس بعيونه خلا دارت به اسباعــه
يلم السعد بيدينه ولحظة كـــــل شــــي شـــتــات = قلوا كيف السعد يُرسم ما دام النفس ملتــاعة
يحاول يثبت وجوده ولكن مــا نــفــعـــه إثـبــات = اذا مد الذراع شوي حظه يكــســــر ذراعـه
يقاسي لوعة الماضي وتتجـدد مـــــع الأوقــــات = على ضحكة ولو مرة مناه وغاية أطمـــاعه
يسولف عن تعب قلبه وتظهر من صمــيـم الذات = علوم تهدّم جبالاً لها ندرة ومــــــــطــــلاعه
ترى أكفانه على أمتانه حسب عمره من الأموات = بقي له ساعة المكتوب اذا جت ينقصر باعه

عبدالله الساعدي 26-12-2009 14:14

يا صاحبي



يا صاحبي تدرج عليك النوايا =من ناس للشينات والشر ناوين
داريت لاجلك والنوايا مطايا =كلاً يبي قربك وبالحيل غاوين
في طرقتك لا عد توصي وصايا=أنا معك في ساعة العسر واللين
لا احتجتني تلقى كفوفي نشايا =وأنته على كيفك توجه على وين
تبرق وترعد لك مزوناً همايا =من حيث ما وجهتها يسار ويمين
لكن نصيحة خل عنك القضايا =بعض القضايا ما لها حبال ويدين
شفتك كذا مرة تسوق العطايا =في ناس ما تسوى في السوق قرشين
ترى العطايا للخطالة خطايا =تجلب لك الدينات يا رعبة الدين
وش مكسبك لا ارسلت بعض الهدايا =الا خسارة للمواثيق يا زين
كثر الزرايا والخطاوي بلايا =مثل العمى لا اقبل وصاوب على العين
ابعد وخل البهرجة والدنايا =ولا تغرك ضحكة ابليس وتشين
وراك ياما ناس قالوا حكايا =هرج القفا كالسم ما بين نابين


عبدالله الساعدي 26-12-2009 14:39

الهوى غلاّب


عجزت اباري الهوى وابادل شعوره=ما عد معي قلب يهنى به ويبرى له
الحب يبغي قلوب مؤدية دوره=وأنا فؤادي صويب وحالته حالة
شاهد همومه معي بالصوت والصورة=وشلون غطى عليه الهم واحتاله
أخاف كثر التعب يطلعه من طوره=ويذوب شريانه وتتقلب أحواله
وأسبابه إنه مفارق بنت مأسورة =أسيرة في حبها ما تبكي الإ له
تجلس تحرى طلوع اليوم وظهوره =من شان يملي بصرها طلـّة اقباله
تزعل كثير العرب وتضايق حضوره =ما غيري أنا تدنـّي الراس لاجلاله
فيها الحلى زاد دلوعة وشطورة =محدن وصل قلبها غيري ولا طالة
هي الربيع الذي ينبت به زهوره =وتهل ديمة منه وتخضـّر جباله
هي الهوى يوم طار العشق بطيوره =وهي هي كل شي ما هيب مختالة
طاري الوداع يدق بالقلب ويزوره=وأنا السبب في المفارق واتعنى له
هذا زمام الزمن والوقت ودهوره =فارض علينا ولازم نتحرى له
يا بنت هذا القدر يقسم لنا جوره=ما في يدي حيلة الإ نتهيا له
حتى ابتساماتنا بالحيل مكسورة =نضحك ووسط الصدر نيران شعالة
واحلامنا من كثير الضيق مذعورة =ادنى سبب تفتز من زود ما جاء له
ابكي ودمعي على خدي من شهوره=ما فادني غير زاد القلب غرباله
حظوظ متيسرة وحظوظ معثورة =يا ويل من كان حظه يذبح آماله
كلْ ساعة اقرا على قلبي ولو سورة =واكايد الهم فيني واحلل اغلاله
ما لك يكون الصبر ..........=غيري كثير يحل من بعد ترحاله




عبدالله الساعدي 26-12-2009 14:41

حبيبتي



مجبور يا عاشق من الوقت مجبور =هذا قسم روحك وهذا قدرهــــــــا
هذي الليالي لفّت القلب وتدور=والروح يا روحي تزايد كدرها
مفارق اللي بالحسن يشبه الحور =حورية يُذهل لمن هو نظرهـــا
الشمس تأخذ من حلا وجهها النور=حتى الليالي المظلمة هي قمرهــا
الشعر مثل الليل مفرود منثور =على ردايفها تساقط شعرهـــا
صدراً عريضاً به كما الطلع منظور =وإلى نزلت أسفل تضايق خصرها
وعيونها لو يدرج الكحل ويجـــور=يُخجل رموش العين لمحة بصرها
وجهاً حلو وسموح وخدودها زهور =على عنقها طوق غطى نحـــرهــا
أُوصف ولكن بالوصف نقص وقصور =أوصافها أكثر من كذا يا كثـــــرهـــا
جالس أسلي النفس والقلب مكسور =حيله قليل وكسرته ما جبـــرهـــا
الشاهد الله أني من الوقت مقهور =أموت وأنا ما افتكرت بهجرهــا
أحبها يا ناس بإحساس وشعور=ما هي بكلمة في لساني يجرها
من كثر ما أعشقها ظننت أني مسحور= يا ما حلا روحاً هنيت بسحـــــرهــا
ما أقدر افارقها ولا ني بمعــذور=هي سارقة قلبي وقلبي احتكرها
وإن جاء قدرها قبل ما أموت بالفور=لألبس كفوني وارتمي في قبرهــــا

عبدالله الساعدي 27-12-2009 08:36

يا زين ﻻ وقتي و ﻻ خاطري طاب
هجرك صنع للحزن فيني علامة

حاولت ابرر صدك ببعض اﻻسباب
لكن ما منك اﻻ حسوف و ندامة

عبدالله الساعدي 27-12-2009 08:39

حرّمت أحب غيرك


حرّمت أحب غيرك ولو صار ما صار =مجنون أنا ادوّر بديل لحياتي
وضعت لك في داخل القلب مقدار =انتي السعادة و انتي كل امنياتي

عبدالله الساعدي 27-12-2009 08:42

آسف حبيبي


[poem=font="simplified arabic,5,blue,bold,italic" bkcolor="transparent" bkimage="backgrounds/30.gif" border="double,5,darkred" type=0 line=0 align=center use=ex num="0,black""]
حقك علّي لا من تماديت بخطاي = جيت اعتذر وابغى العذر والسموحة
ادري عليك أخطيت والحق منجاي = تكفى فؤادي لا تزوّد جروحه


الساعة الآن 22:10.

Powered by vBulletin® Version 3.8.7
Copyright ©2000 - 2020, Jelsoft Enterprises Ltd

Security byi.s.s.w

 

Security team

vEhdaa 1.1 by NLP ©2009