بنت بقعاء
[poem=font="simplified arabic,5,blue,bold,italic" bkcolor="transparent" bkimage="backgrounds/30.gif" border="double,5,darkred" type=0 line=0 align=center use=ex num="0,black""]
في نصف ليل البارح الناس هجّاد =خذتني الخطوة على عد مورود
اراقب النجم الذي ما بعد عاد =واقفيت في درباً وتاليه مسدود
وردت مثل اللي على العد ورّاد =واطفي ظماي بشربةً تبري اكبود
سمعت صوتاً ما عرفنا له ابعاد =واطالع يميني ويسراي يا كود
سويت نفسي ما اسمع الصوت لا ناد =واتجاهل الصوت الذي صاح بي زود
فكرّت بالمصدار والحس يزداد =اثره على المنهل مواليه ويرود
ظهر قبالي واحدة راكبة اجواد =ومجرّدة سيفاً من الغمد محدود
تنشد تقل وش جابك الحين ترتاد=ما تدري المنهل حمى جدي العود ؟؟
قرون واحنا نحتمي دور وبلاد=عن كيد عدواني وعن زَرْق بارود
وانته بلا استئذان ورّاد منقاد =واحنا معانا صك للعد وعقود
قلت العذر تكفين يا بنت الاجواد =تاهت بي الخطوة في الدرب وحيود
طرقي بذي الديرة ولا اعرف بها اسياد =والليل ما يرحم ملازيم موعود
ضايع ولا اعرف طرقتي اشلون تنعاد =يا ليت وقتي من قبل ساعة ايعود
قولي وش انتي لاعرف انساب الاجداد =ابي تفاصيلك ونرقى بك اسنود
قالت باعلمّ لك اذا كنت نشّاد =واسمع كلامي جاك منظوم مسرود
أنا من اللي ينحسب روس الاشهاد =يبدون بالاشوار والعلم معقود
جنية ما تحسب اقوال الاحقاد =ما حسّبت عاذل ولا ضيق محسود
مير انت علمني عن اهلك والابداد =يمكن اسامح ع الخطا واحلل قيود
قلت اسمعي يا شامخة فوق الانقاد =انا من اللي حرروا كل مضهود
لابة عزايمها في الحرب وجهاد =تدكم على روس المشاريف وتنود
يوم الوغى تبدي بقوات وعتاد =ورجال عشقانة على الموت وجنود
لا درهمت سود الليالي بالاعياد =تثبت في الموقف كما النايف الطود
من جورنا نكسر صليبات الاصفاد =من عدلنا تنهّل هذاليل وتجود
قالت دخيلك لا تكمّل لنا عاد =وش الذي باقي مع الناس منقود
نِزْلتْ وسجّينا من الوقت ما جاد =واخذت وياها سواليف وعهود
مرة تسولف لي عن الجن لا ساد =ومرة تقول ان البشر ما بها فود
صارت نجوم الصبح في وضع الاعداد =واصبح مفارقنا كما كسرة العود
غابت وانا كني في سبات ورقاد =حتى العد اللي خابره صار مفقود
رجعت اقول إن الصدف خير ميعاد =واللي حصل نلقى له اثبات وردود
لكن حقيقة ما هي اصرار وعناد =إن الشعر يُكتب في عيونها السود
لو شفتموها كان غيري بها انصاد =وخصوص الى شاهد حلى التوت وخدود
الزين ما هو للاوادم ومرصاد =اجمل بنية عندها سهود ومهود
يا بنت بقعاء ما لنا عنك مشراد =زينك في العينين ما هو بمجحود
[/poem]