لا تصدق كل ما يقال في شخص ؟؟ موقف مع دكتور في مستششفى الحرس !!

حقيقة لا ادري ما اقول لكن هي قاعدة تعلمتها انك اذا سمعت عن انسان لا تعرفه شيء مشوه لصورته فلا تصدق لان المشكلة ربما فيمن يتعاملون معه ..

لن اسمي هذا الشخص باسمه ولكن ساحكي لكم ما حدث وآخرها اليوم ..

عندما دخلت مستشفى الحرس قبل سنة تقريبا للنظر في مسألة زراعة الكبد ودلفت القسم سألت بعض الموجودين من افضل طبيب في مسألة التعامل فاجمعوا على التحذير من الدكتور فلان وانه عصبي ويرفع صوته على المريض فقلت في نفسي اللهم حولينا لا علينا اللهم اكفنيه بما شئت

جاء دوري واقبلت على الاستقبال وطلبت ان ادخلوني على اي دكتور غير فلان

ضحكوا وقالوا اجل سمعته واصلتك قلت المهم ؟؟

وفعلا دخلوني على دكتور آخر واثناء الكشف مر شخص وسلم على الدكتور وذهب ثم رجع واخذ يتكلم انقليزي مع الدكتور "" على باله ما افهم "" ثم التفت علي وكانت المفآجاة يوم نظرت الى بطاقة التعريف المعلقة على جيبه فاذا هو الدكتور الذي حذروني منه ؟؟

قلت حياك الله يا دكتور الحين انا هارب منك وانت ما شاء الله جاي وراي فضحك حتى بغى يطيح قال لي ليش واصلك اني مو زين

قلت ابقولك بس توعدني ما تزعل قال وعد

قلت يقولون انك ترفع صوتك عالمرضى وتصارخ ؟؟

قال للدكتور اللي يكشف هات ملفه قلت شكلنا بنتهاوش

ثم قال والله اني حبيتك وانا اللي ابشرف عليك اذا تسمح لي قلت وانا ارتحت لك

ضحك وقال يا حبيبي انا ارفع صوتي لمصلحة المريض وهذا طبع فيني قلت الله يعين زوجتك عليك ..

بغى يموت من الضحك ...

ومع المراجعات تبين لي ان الشخص غير اللي يقولون !!

آخرها اليوم قال عندك متبرع قلت اييييييييييييييه قال قم معي قلت وين ؟؟

ومسك يدي ووداني لمنسق الزراعة وقال خلصوه بسرعة ولا ترى بيشكيكم والمنسق يضحك

قال ابشر يا دكتور ويوم راح اعتذرت من المنسق وقال عادي هو دايم يصارخ علينا

مقصودي لا تصدق كلام يقال في اخوك !! اي كلام ترى يمكن الواقع غير وسلامتكم

أولا لا بأس عليك يا الحبّوب وطهور إن شاء الله كأني فهمت أنك تعاني من مشكلة في الكبد
إن كان كذلك فطهور إن شاء الله وأجر وعافية

ولو تبي شي من كبدي ترى ما تغلى عليك ... تحت أمرك يالغالي

ثانيا: موقفك هذا فيه درس وعبرة أن لا نحكم على الآخرين بمجرد السماع بل لا بد أن يكون الحكم بعد التعامل
والتجربة

فموقفك هذا يتكرر مع كثير من الناس يسمع كلام سلبي عن آخرين وبعد كذا يتفاجأ بالعكس