راحت الأيام والخاطر جزوع
والظروف تسوقنا ونسوقها
رحلة الدنيا ذهاب بلا رجوع
تحت الأرض اكثرمن اللي فوقها
والحظيظ اللي من الدنيا قنوع
عاقباً كل الفتن وطروقها
والله اني بالرحم ماني قطوع
والعهود الوافيه ما خونها
المحبه سحر والفرقا تلوع
كم عشيقه فارقت معشوقها
الحياة تطوّع اللي مايطوع
مثل تطويع الرعاة لنوقها
والرحى تطحن محاصيل الزروع
والعيون تخيل نوض بر وقها
الحياة تخلي النايم يفوع
والأماني من قطف زملوقها
الحياة افراح واحزان ودموع
والأمل نور الحياةوذوقها
تختلف روس الرجال من التبوع
والرجال تبين من منطوقها
بالسلوم وبالمذاهب والطبوع
دبرة الخّلاق في مخلوقها
وعادة الحاسدمن الطّيب بشوع
يحسده في لقمته لا يذوقها
كثرت عفون العرب من كل نوع
سمّها ببطونها وشدوقها
مايبونك في سما العزه طلوع
والقوافل ماش شي يعوقها
الله اعلم وش ورى عوج الضلوع
السراير في بطن صندوقها
الردي له سوق تنصاه التبوع
والمراجل له أهل في سوقها
النخيل اللي لهاتمروفروع
طيّبه في طلعهاوعروقها
والأثل لوله عروق وله جذوع
مابه الا الدوديرعى عذوقها
الحياة دروس والفجعه تروع
بكرة الأيام تطوي طوقها
السنه مثل الشهر وألاّ السبوع
والأوادم مالحقت ملحوقها
أمس يوم السبت واليوم الربوع
مسرع من غيابها الاّ شروقها
أطلب الله في صلاتي وبالخشوع
كان ضاقت بي جميع طروقها
الذنوب كباروالوالي شفوع
لو وصل ذنب البشر لحلوقها
ــــــــــــــــــــــــــــــ
