السلام عليكم..... والعون
كلن واسمه يالربع
ولا حال بكم شر
الأعلام ما بها إلا الستر والجماعة كلن على بلاده إللي يذرا واللي يحرث البغره لله الحمد جازية
واما انا صار عليه قصة ابعلمكم بها بس لا تضحكون علي..... اوحيتوا
ذاك الزمان وانحن في جناب الريشة معنا نحل وصاحبكم دوبي متوضف ولابس ثوب ابيض مكوي ومعطر
ومن يوم شافني النحل وانت تقل مافي الارض عدو له إلا انا
وهو ينصب علي إلى في الايدي وألي في الوجه والا والعلم اصرم .. ما فيها إلا شردة
واحط رجلي ماعاد ابي اقف له
حصيلة الشردة واحدة لحقتني في الجبهه فوق العين والحمد لله انتفخت العين واليوم الثاني يوم السبت دوام لازم اروح اداوم ومن وجع العين غطيت بالغترة على نص الوجه مستحي من الناس
الهيلكس فراملها ضعيفة وما فيه استمارة
واتكل على الله للدوام والا والاشارة صفرا وبغيت اقطع ويوقف قدامي مصري معه مازده وانتفه ويتقدم شوي وارتد عليه مره ثانيه وانتفه
وهو ينزل وينادي المرور طبعا الصورة قدامه مفجعة وهو يتأمل ويفكر
جاء المرور ... فين الرخصة؟؟ نسيتها في البيت من وجع العين أعماني... فين الإستماره؟ ما فيه استماره
يلله على قسم السير العسكري معي في السيارة والمصري قدامي
وأول إشارة وانتف المصري مرة ثانية... وارتد .. وانتفه زيادة,
العسكري طاحت البريه على الطبلون من الصدمة وأخذها ولبسها ونزل من السيارة ولا عاد شفته
والمصري نزل يقول (( اي ده!! دا مستقصدني يابيه)) ويوم شاف العسكري شارد حرك سيارت وما عاد اريته وإلى الان وانا في الاشارة
الشوارع تسكرت من السيارات وانتضر لا مرور ولا مصري وابي الفزعة... تكفون شوفو لي حل
وسلامتكم