طبع الزمن+فراق الاحبه

.


((طبع الزمن))

البارحه والفكر في بحر سجاته
غبات مده طغت واهتاض مكنونه

ياكيف يسلى المعنى عن معاناته
وياكيف يهنى لذيذ النوم بعيونه

طبع الزمن لو ضحك في ساير اوقاته
للخلق لابد يوم احزان يبكونه

مابين حلوه ومره عشت لحظاته
جبلته قد عرفنا شكله ولونه

ماهو عجيب الزمان ولا حركاته
مير العجب صدق في ناس(ن) يعيشونه

الوقت ماهوب عاجبنا بدوراته
والعيب فينا ومنا الوقت ياعونه

احب خشمه بروحاته وجياته
دارت رحاه وكشف فالناس مظمونه

بعض البشر مصلحه يبني علاقاته
لاجاك له حاجة(ن)تضحك لك سنونه

ودرب الرداء مانويت اقطع مسافاته
لنفس حاجز يجي مادوني ودونه

مااهتز راس الكفو من كثر صكاته
وما نالو اهل المطامع مايمنونه

وسلامتكم،،،

ابوساعد
.


.

((فراق الاحبه))

فراق الاحبه لدمي مصاص
ونابه على حيد الجفى محدود

الا ياوليفي والعمر مخلاص
خذه واقضى مديون اليالي السود

ترى منزلك بين المحاني خاص
ولك خاطر(ن) لاجل الرضى ممدود

اسوق المشاعر فوق ظهر الباص
ولكن دربك خابره مسدود

تمهل على المحكوم ياقصاص
رجوعك عفو دام الامل موجود

انا لاسلمت الحد حظي حاص
عن الجرف ومعارض هبوب النود

رموشه تهد السحر للمقناص
واجي طوع لاطارد ولامطرود

برق هاص لا سلهم وجيته هاص
حياتي ورق مع غايه المقصود

وسلامتكم،،،،

ابوساعد

.

صح لسانك وبيض الله

بدع ورد رائعين

صح بدنك يااسير الشوق لاهنت