أشعار الشيخ حمدان بن محمد بن راشد ال مكتوم ((فزاع ))

[أريج الروح]

أشعار الشيخ حمدان بن محمد بن راشد ال مكتوم ((فزاع ))

من هو «فزاع»؟

أنا عنواني اشعاري واسمي في معانيها وأوّل بيت أنا قلته غدا تاريخ ميلادي
إذا تنشِدْ عن أخباري من اوّلْها لتاليها أنا اشعاري هي اخباري على ما اْريد تنقادي
وانا أمّي إماراتي ولِدْت وعشت أنا فيها وابوي أمجاد عرباني وطاري ماضي اجدادي
واخواني أنا المليار مسلم في أراضيها وانا القرآن والسِنّه غَدَوا زادي وزوّادي
أعيش هْمومي وفَرْحي ولا لي نيّه أخفيها وأكبر همّي المقدس وطفلٍ جنبه يْنادي
يهزّ بْصَرْخته أرضٍ نوى الصهيون يمحيها من التاريخ، والعالم وقَفْ مكتوف الايادي
وانا ايّامي هي اسْتاذي تعلّمني لياليها فلا خيرٍ بإنسانٍ يِفادْ ولا بَعَدْ فادي
و(زايد) قِدْوِتي (زايد) و(زايد) من يزهّيها بلاده شانها عالي باسمهْ دايمْ تْشادي
وروحي (محمّد المغوار) ابن راشد يغذّيها من أشعاره من أفكاره، بنيت بْمجدهْ امجادي
مرَبِنّي على الجودْ وعلى المعروف واحميها بلادي حبّي الأول ولا لي غيرها بلادي


خلاص يعني


خلاص يعني كل شَيّ انتهى وراح خلاص يعني ما بقينا حبايب
يعني وعودك كلها كانت مْزاح والاّ انت ما لك في المحبّه رغايب
وين العهود ووين لحظات الافراح يعني تلاشت مع هبوب الهبايب
القلب بعدك من له اليوم يرتاح من بعد ما هو في محبّتْك ذايب
ياما على شانك تحمّلت الاجراح وياما جروحي من صدودك عطايب
سرقتني عن جملة الناس يا صاح والفكر عندك ماخذنّه نهايب
خِلّك يحبّك يا بَعَدْ سِيْد المْلاح إن رحت عنّه راودنّه مصايب
خَلّك معه دام الهوى حيل نضّاح والواش رِدّه يا هوى البال خايب

إلى (أمّي) .. مع التحية


وش خانة (دبي) وْبَحَرْهَا مادام شمس (دبي) ما حَدّ
تبكي فيافيها وشجَرْهَا والطير عيّا ما يغرّد
و(زعبيل) لى مظلم قصرْهَا ما به سوى صوت الصدى يْرِدّ
وِنْجوم تسأل عن بدرها لى ينير داجي الليل الاسود
يا شمعة الدار وسفرْهَا يا امّي من الشوق آتوقد
إن كان شِعْري ما حصرْهَا الاشواق تظهر في التنهد
تجيب لي النسمه عطرها لى يْغَار منّه فايح الورد
القلب ينبض به ذكرها وِطْيوفها في العين ترقد
الله يطولْ في عمرْهَا وتبقى لنا وبعمرها يمِدّ
وعساه ما يطولْ سفرْهَا وِلْنا بخير انشا الله تْرِد

أنا في الشعر..

أنا في الشعر ابن هذاك إذا إنته تعَرْف الشعر أهيجْ في البحور أمواج، أمشّيها على كيفي
واقول لك لا تجاريني ترى أمشي بدربٍ وعر واذا تبغي تجاريني ترى لك صامدٍ سيفي
ولا تضمن تحوز النصر وانا بحرٍ وانته نهر واذا عارضت تيّاري تبرّى موجي وْسِيْفي
وكم من واحدٍ غيرك تعرّض لي وجاه الكسر ودارت به هبوب رْيَاح في أقوى عواصيفي
تهاجم سايل الأقلام وسطرٍ ما يهزّه سطر وإنته وينها افكارك عن بْيوتي وْتهديفي
تبا روس العلا وانته تحوّل في طريقك حدر تحاول بس ما تِقْدَرْ بأن توصل مشاريفي
نجوم الليل ماتنوِرْ إذا بيّن شعاع البدر وش اللي يجمع الوسمي على سحب ورْعد صيفي
تشوف الجاذبيّه لي في هالدنيا تجرّك جر أنا عكسه أفرّك وين ما أبغي على كيفي

مستحيل أنساك

مستحيل أنساك هذا مستحيل مستحيل أنساك والله للأَبَدْ
من يعاشِرْ شخص مثلك ما يميل لا ولا ينوي على غيرك أحَدْ
يا جميلٍ في جميلٍ في جميل يا فريد اللون في جيدٍ وْخَد
ترتسِمْ في وجنتك شمس الأصيل وجمرتينٍ بينهن صَفّ الَبَردْ
والعيون الدعج والرمش الظليل ونور وجهك منّهن نور اسْتِمَد
تهت في حبّك مثل تُوْه الضليل وزادت جْروح الَحَشا جْروحٍ جِدَدْ
ولا ولا عن حبّك أرضى بالبديل وْكَنّ باقي الخود تكمالة عدَدْ
لي يسير الدرب يوصَلْ لو طويل أو مِثِلْ ما قِيْل من (جَدَّ وَجَدْ)

عَوّضوك بْغيابي

عَوّضوك ْبغيابي لا تقول انّي َوحَشْتك لا تجاملْ دخيلك في شعور يْعَنيني
بَسّ يكفي كفايه لا تمادى عَرَفْتك خَاين الحب مَا له في فوادي حَنيني
إنت ياللي بعيني حِلْم عمري رسَمْتك وكيف تجرح خفوق يعشقك من سنيني
أحسبه زاد حبّي في غيابي وْحسَبْتك ما تجاهَلْ وِدَادٍ كان بينك وْبيني
كَم سَهَرت الليالي وكم ليله سَهَرْتك وكم ليله خَيَالك نام في وسط عيني
وكم قل لي دخيلك كم ليل اْنتظَرتك كم قل لي تِفَضّل، كم صَدّك يجيني
كنت تجري بْدَمّي لا نزَفْته نزَفْتك كنت ساكن خيالي، داخلي مِحتويني
من كتَبْ الحروف الأبجديّه كتبتك "لامَه" إن كان تبغي أوَّلْ الحرف "سيني"

توااااق

توّاق لك أشكي ولا زلت فزّاع لكن تبدلْ حال وابغيك تفْزَعْ
انت الذي لك رمز في كل مطلاع يوم الرجال تْحين (توّاق) يطلع
المجد لك يا فخر الامجاد ينصاع غصبٍ عليه وتحت رجليك يِخْضَعْ
والعز بامرك يا سنا العز مطواع ومن كان مثلك.. كان للعز مربع
غصت فْـ بحور الشِّعر لين اغزر أقواع ومنزلك عالي.. يا نجم فوق تلمع
الحر في المقناص معروف طَلاعْ وانت الفريد.. النادر.. الحر اْلاروع
كلٍ له اعجازٍ.. وكلٍ له ابداع لكنّك انته بالفعل صرت الابْدَعْ
لو باكْتِبْ مْن اليوم ويجف لِيْراع ما اظنّي أحصي كل ما فيك واجْمَعْ
ظبيٍ سَرَقْني.. ماخِذْ القلب بِخْداع حلوٍ وداده.. لكن القول يِخْدَعْ
كمٍ تحمّلته وكم جتني أوجاع !وانا ابتسِمْ له.. كيف والجرح يوجع
أبغي دخيلك آخِذْ الصاع بالصاع آخِذْ قضايه لين لِعْيون تِدْمَعْ
فزّاع يشكي لك.. ولا زلت فزّاع لكن تغيّر حال وابغيك تفْزَعْ

سرية فكر

سرى فكري وانا (فزّاع) والدنيا بها ضَجّه واظنّ ان الشِّعِر هاليوم يبى يقضي على حاجه
سرى بْليلٍ وفي بحرٍ يعانِد غزره وْلجّه يقاوم جرّة التيّار ولو تطمي به أمواجه
بحور غْزار يبغيها لأصعب دَرْب متوجّه يبى روس العلا وْيقدر على صعبات اْلِمْواجه
يطول الدرب كم بيطول وحرف القافيه غَلْجَه ولكن يقدر ان يبني بيوته تصبح أبراجه
على وصف الجميل الفاتن الساحر لنا حِجّه مادام الحب هو ليل المتيّم أو هو سْراجه
عنودٍ رمشها سَلْهَم وعينٍ ناعسه دَعْجه وخدّ مْورّد ومِنْوِر طبيعي دون مكياجه
ووجهٍ من سنا نوره على البَهْجه ضفى بَهْجه مزونٍ غيثها البسمه ليا من تضحِك حْجاجه
وميدولٍ على متنه كما داج الدجى هَجّه على عودٍ كما قزّ الحرير الناعم انتاجه
جميل وكل ما فيه الجمال سْكوته وهَرْجه واذا للزين منهاجٍ حبيبي الزين منهاجه
أهو تاج الجمال .. إلاّ مداه اللي تبَعْ نهجه وانا اشهد بانّ حِسْن الفاتنات لْصاحبي تاجه
تصدّق من كِثر حِسْنِك تصيب بعالمك رجّه ولي تبغي له احراجٍ بحسنك تملِكْ احراجه
حبيبي لا تلوم القلب ، لوم عْيونك الدَعْجَه بها حاجه ولا ادري وش بها لكن بها حاجه
دخيلك يا هوى بالي حبيبك في الهوى نَجّه ترى حبّك سبب همّه وصدّك سبّة ازعاجه
واذا المطلوب مِ الخَفّاق منّي يطلب الرِفْجَه ورِفْجَه ما أردّه دام هذا القلب محتاجه


لعبة زمن

لعب الزمن ما هو مثل باقي العاب إلعب على كيفك واذا تروم لا تْتوب
بَيْجيك يوم وْتندفن تحت لِتْراب عقب الدفن بَتْعَرْف وش يعني لْعوب
لو نك فَتحت أبواب لك غَالقٍ باب ولو نك تعرف العيب العيب عَذروب
بديت أكتب واجلب كْتاب بكْتاب آخذ معَانيهن واخلّيهن بْصوب
إذا الشِّعر يا ناس قِدْ جاب ما جاب وان جاك شِعري بالفعِل جَاك مَكْتوب
هذا وانا أرقى على كل مرقاب أسري بليل الضدّ من فوق عَرقوب
هذا وانا أشّر وهي تطير أسراب بيض الحَمام تطير ما تحمل ذْنوب
هذا وانا تايب وإبليس ما تاب هذا وانا أنعَت وهو ضَيّع دْروب
هذا وانا أضحَك وهو يضحك بْناب ثوبي ستير وصاحبي عَاري الثوب
هذا وانا اعدّ الخَطا عَد لِتْراب ينعد كيف انعد وهو كان محسوب
بعض البشر تحسب على كيف الاسباب وبعض البشر من دون سِبّه ومطلوب
كلٍّ يحَسْب احساب وآنا احسب احساب وْكلٍّ يجي باسلوب وآنا لي اسلوب
بَابٍ فتح من بَاب والباب كَذّاب بَابٍ إذا يفتح ترى الباب مَكْذوب
هذا وانا اغنّي وانا اقول سَحّاب سَحّاب يَمطر صوب وانا أمطر بْصوب
مثل العروق تجيس وتدق الاعصَاب أو مثل سَاحِر طار في الجو مجلوب
من هو يأمِّن يمشي بْليل في غَاب بعض العَسَل يا صاحبي سَمّ مَشْروب
هذا هَدفيه صبته وْصَاب بصواب صوب الذي صَوَّب ولا صاب مَصيوب
بحرٍ غزير وْطامي البحر عَبّاب ونَارٍ تطَفّي نَار من حَرّ لاهوب
حَدٍّ عليه عيون والناس رقّاب وْحَدّ اختفى لو كان بالحيل مَرقوب
حَدٍّ يشلّ سلاح وْحَد شايل حْراب حَدّ يعشق شْروقٍ وْحَد يعشق غروب
حَدٍّ يشيل الهَم في ضَرب الاصحاب كل من ضَرب في يوم له يوم مَضروب
أنا معَادِل آخذ الحُب لاحباب وْكلٍّ يحب الطيب .. الطيب محبوب
قالوا سَهَل إنّي أنا أفتح الباب وانا هويت الصعب لو دارت حْروب
لعبَه وانا ألعَب على كل الالعاب طبعي أنا غَالب ولا آكون مَغْلوب

أمجاد


الشِّعر له أمجاد والبيت له مجد ومن هو يروم يوصِّل الشِّعر مجده
الشِّعر له ميزه وفي ميزته عد ياما شويعر إنجلب شِعِرْ ضدّه
لا تقسم الخفّاق القلب ما يْبِدّ وراعي البدايه في هوى الشوق بَدّه
في فرق بين جْبال وفي فرق في النَّدْ سهلٍ رقاها بس في الفرق مدّه
واذا تسنّ السيف في موعد الحد ردِ السيوف ورد سيفك في غمده
خَلّك شجاعٍ لا تْعَرِفْ حر لا برد لا برد حرّه ولا بَعَدْ حرّ برده
وانا فهمت الشِّعر هو ما يبي قَدّ إنت الذي ترفع له الشِّعر قَدّه
إن فاض سيلك فايض السيل له سد وسدٍّ يسدّ السدّ وسدٍّ يسدّه
وان كان المطوّع ولا طاع وارتد يا هي حسافه كيف طايع وردّه
ما يردّه إلاّ ناعس الطرف والخد ودّه يحاول يوصل الخَد.. ودّه
إن جيت أطالع عيني بْعينه تسد بس يكفي انّي شفت عيني بخدّه
هذي مشاعر شوق والحب والود يبغي يغيب بْعيد والشوق عنده
في بسمتك (عَزّام) يتفتّح الورد كن المطر نازل على أوراق ورده
يا ما أضيع بشوق في ليلٍ اسود ويا ما يضيع الليل في شَعَرْ هَدّه
يلعن مشاعر لا تجي مَدّة اليد يوقف خفوقي يوم من بس مدّه
هذا بَحَرْنَا يْسَاوي الجزر والمد كلّي تساوى بين جزره ومدّه
الشِّعر له أمجاد والبيت له مجد وهذا يروم يوصّل الشِّعر مجده
فاءٍ وراها زين ومن عقبها مَدّ وعينٍ وْرِدّ الزين وْعَ الزين شَدّه ​

 

[أريج الروح]

قلب صادق..

لا تقول الحب في القلبين مات هذا توّ الحب كيف انّه يموت
ولا تقول ان الشِّعْرِ ليل امنيات وانت توزِنْ بيت وتكسِّر بيوت
الشِّعْرِ نبض القلوب الصادقات كم رفعنا به على طاريك صوت
لا تخلّينا على بحر السكات الكلام أحيان أفضل مِ السكوت
خَل ما بينك وما بين الوشاة (مثل ما بين (الرباط) و (حضرموت
دامني لجلك نذرت المقبلات لا تخيِّبْ لي ظنون ولا نعوت
خِذْ مشاعر قلبي الصادق وهات ودّ صادق واحذَرْ أقوال الشموت
احْذَرْ احْذَرْ والدهر له نايبات واحْذَرْ انت تطيح شَبْك العنكبوت

ولا يقدَر يلمّ الشمْل غير القايد الربّان

يمين الله يمين الله عقب ما ضجّت الوديان بامدّ غْصون عذري قبل تثمِر بالذنوب غْصون
أنا باستغفر الله وارجع اتعوّذ من الشيطان قبل لا ابدا الكلام وقبل ترجح بالكلام وْزون
قبل أعزا العَرَبْ واعزف سنين اللي خبرها كان أقول اش حال نخوَتْنا وحال اللي رضوا بالهون
علام قْلوبنا شَتَّى وبين أفعالنا شَتّان تخالَف فكرنا حتى ضحَك من حالنا شارون
تسنّمنا الخلاف بْداجْ ليل وصبحنا ما بان عن ايّة صبح نتكلّم ما دام أن الطريق ظْنون
سراب الظنّ يغري بس يا بعده عن الظميان !ومن يتبع سراب اللال ظنّه وش عساه يْكون؟
ومن يتبع سراب اللال ظنّه يورِدْ الغدران مِثِلْ من يطلب مْن الموج في عِز العواصف عون
غريبه كيف حاضرنا غدا من حاضره حيران وإذا منّا ذِكَرْنَا لي مضى صار الكلام شْجون
ذِكَرْنَا عِزّ ماضينا وضاق بْدمّنا الشريان وضاق البحْر بِدْمانا وضاق بْنا وسيع الكون
جرى دَمّ العَرَبْ من مغرب (المغرب) الين (عْمَان) من (المغرب) الين (عْمَان) ضاقت بالعتاب حْضون
غدا صنع الدهر فينا صنيع السيل بالعيدان بلَغ حَدّ الزبى وارّث بنا من كل صوب طْعون
تقلّب يا دهر ما بين زيف القول والكتمان كما الأفعى تقلّب بألف معنى وألْف لون ولون
عِراق المجد ما تطوي مشارقها سما النسيان ولا والله ننساها ولو بعْض العَرَبْ ينسون
نحبّ أرض (العراق) ولاجل أهَلْهَا يرجح الميزان ويهتف باسمها ركْب الشعوب اللي غدوا يسعون
سعوا من شرْقها للغرب يرثون العَرَبْ ركبان غريبه كيف حتى الغرب لاحوال العَرَبْ يرثون
شعارات الوفا طاحت بيارقها على الشطآن على شط (الفرات) و(دِجله) انهارت كبار حْصون
على نارين نار الحرب والفتنه لها نيران جرت بين القلوب ونوّخت في حاضرة هارون
تشتّت شمْل من كانوا على درْب الرخا خِلاّن يجدّم بعضهم قوله وردّ البعض منهم دُون
ولا يقدَر يلمّ الشمْل غير القايد الربّان حكيم الراي له نرضى وبه كل العَرَبْ يرضون
قدَر يجمع شمِل هذا الوطن من سالف الأزمان ولازالت بلاده بالمكارم قدْرها مَصْيون
بعزمه وحّد بْلاده ورَدّ بْحزمه الطمعان وثبّت منهجه بالحقّ والدستور والقانون
تسامَت به قوافينا ومالَت بالقصيد ألحان بذكر اسمه تسامَت وافصحَت عن درّه المكنون
سموّ الوالد القايد نَعَمْ زايد ابن سلطان نَعَمْ زايد نَعَمْ زايد بذكر اسمه تقرّ عْيون
نَعَمْ زايد نَعَمْ زايد اهو اللي شيّد البنيان وعلاّ للسما صرحٍ تضمّه راسخات رْكون
مواثيقه على العدْل اشهدت باسم الله الرحمن وراياته على متْن السحاب وجانبه مامون
على مَدّ النظر مدّة يمينه ما يردّ إنسان ولا ضيفه يردّ إلاَّ وعنقه بالثنا مَدْيون
وَلا قلت الجديد إن قلت جوده وَرَّدْ العربان صفات الجود له تشهد وبه كل الملا يدرون
مزونه ما تميّز من كَرَمْها ظامي ورويان وإذا هلّت تسوق بْطيبها ما لا تسوق مْزون
وإذا للفخْر داعي نحن نفخر به رفيع الشان وإذا للدار داعي كل منّا حاضر وممنون
يمين الله يمين الله متى ما ضمّنا الميدان لَتلقى فعلنا مع قولنا باسم الوطن مَقْرون

طاحت الحيّه

هلا باللي سبى قلبي واخذني حسنه بقوّه سَلَبْ روحي واخذ صبري وأنفاسي من يْديّه
أحسّ انّه لعب بالقلب لعبة شاطر وْمَوّه يبعثرني.. ويجمعني رجا واحلام ورديّه
إذا نوّر ظلام الليل عرفت ان الفجر ضوّه تبسّمْ من جبينه مبسم الصبح وضحك ضيّه
واذا سلهم برمشه طرت من جَوّي إلى جوّه ورحّب به خفوقي غصب عنّي قال يا حَيّه
أثاريني بحسنه طحت وانا اظن الهوى توّه فكيف ان الهوى توّه وانا غرقان في طيّه
تعلّقته وصار اليوم نوّ القلب من نوّه مع انّي قبل هذا اليوم كانت نيّتي نيّه
قبل يطري الحسن حسنه لفظ قبل اسمه سْموّه تسامت به سنا الحسن وسرت له سحب وسميّه
تقول ارفق بمن حَبّك وعقب اللي تبي سَوّه ترى ميْتك إذا شافك ترد الروح به حَيّه
حبيبي خاطري عن ما بدا له عبّر وْنوّه ومن شرواك يفطن وانت شمس الخاطر وْفَيّه
إذا كان الحيا يمنعك.. ما تمنعك لِمْروّه واذا خايف من الحِسّاد قِلْ لي.. طاحت الحِيّه

ندى الريحان

يوم أقْبَلت تخطب ندى الريحان لطف وخفّه ما كنّها إلاّ الصبح يوم أقْبَلْ يجرّ أقدامه
تحفة حسن من حولها غيمة غلا ملتفّه كل الحلا محبوس بين أقدامها والهامه
كَنّ الثغر منها نهر والاَّ الشفايف ضفّه ما شفت في عمري نهر له ضفّةٍ بَسَّامه
يحتار فيها من نظر لو هو صِدَقْ في وصفه ويكذّبه لي ما نظر واللي نِظَرْ ما لامه
تحفة حسن لاقت بعين اللي يعرف التحفه ويسوم عمره لاجلها لولا الغلا ما سامه
بعض الصدف فيها حلا يا ما حلا هالصدفه وشلون ما يرتاح لي صادف فتاة أحلامه
ويزفّها بايقاع هادي للحنايا زفّه ويعيش معها ما بقى له من جميل أيّامه
وِيْعَاتِبْ أوَّلْ سِيْنها لانّه تصدَّرْ حرفه مع ان أوَّل اسمها سينه تصدَّرْ لامه

مدخل غرامي

القلب شال الحب والحب شاله مدخل غرامي والأحاسيس حوله
وضاع الفكر ما بين حاله وحاله واسهل حلوله صارت أصْعَبْ حلوله
الحِسِنْ لي يفرض علينا سؤاله كيف الربيع امتد لاربع فصوله
كيف ابتداه الحِسْن ثم انتهى له يا لين حتى الحسن منّه خذواله
وانا اتخيّل في خيالي خياله فرصة عمر تحت ابتسامة طفوله
غرٍ صفا حسنه وقلبي صفا له سهل التمنّي بس صعبٍ وصوله
يحتار فيه اللي يوصّف دلاله ويهين به لي عن جماله حكوا له
يخجل جماله من صفاوة جماله ويغيظ ربّات العيون الخجوله
يمشي معاهم بس كنّه لحاله معهم ولكن كن هم لي مشوا له
والي تعرّض في مرامي نباله والله ما يكسب ولا ربع جوله
عادل ولكن ما برمشه عداله يظلم مجبّينه برمشه وطوله
أصلاً جنوني بس في حَب خاله وشلون لا باوصف تفاصيل زوله
إن قال صَدّي.. قلت: لله قاله وان قال وصلي قلت: بالله قوله
هذا الذي قلبي من الشوق شاله مدخل غرامي والأحاسيس حوله

قراءة مدى

دنيا وداني مواطيها ترفّعها والقرم يرقى بعزمه عن مواطيها
القرم يفرض عليها أمر واقعها يجرح دروبه لاجل يرجع يداويها
يرقى واذا ضاقت دْروبه يوسّعها ويعق فيها مع انّه ما طمع فيها
لان المطامع يثير الشك دافعها مثل الفَعَى يوم تسمع ناي حاويها
لا هو سمعها ولا قصده يسمّعها ولا قصده إلاَّ تناظر ميل راعيها
يطلع بطلعه ولكن ما يطلّعْها بعض المظاهر تزخرف لك مراميها
وشلون ألوم المظاهر والعذر معها والعقربي ما قدر يكشف لياليها
أهل المطامع تغطّي لك مطامعها والوقت يقدر يبيّن لك مغازيها
من حكّم الظن في الدنيا يضيّعها ومن حكّم العقل يكسب في تواليها
ومن أشعل النار لا يامِنْ مواضعها (النار ما تحرق إلاَّ رجل واطيها)
والنار أطفت وانا ما اريد أوَلّعها واذا ارجعت ولّعت أرْجَعْ واطَفّيها
والبسمه اللي لذيذ الزيف وزّعها أقرا مداها واترجمها وامشّيها
وِحْروف ما بين الاسطر سهل تجمعها لكن من الصعب تستوعب معانيها
قليل من يدرك الفرصه ويصنعها يجري بمبداه والدنيا يجاريها
بعض الفرص تغتنمني لاجل أضيّعها واصنع فرص تغتنم من طيب راعيها
هذا وانا اعزّ نفسي في تواضعها واقدّر الناس قاصيها و دانيها
والناس ما تحفل اللي ما يصانعها وتعيب في بعضها لو كان غاليها
تنسى وتذكر علوم اللي يطابعها واذا اختفى يختفي عن ذكر طاريها
تتبع خطا من هو يْحَاوِلْ يمتّعها وتقول ما لا تكنّه في خوافيها
والناس تشكي لحاميها مواجعها وشلون لو صار حاميها حراميها ​

 

[أريج الروح]

فهمت وما فهمت

فهمت العشق لى يطلب من الإنسان ذَرْف دْموع فهمت العشق لى يطلب من الإحساس كل أوجاع
فهمت العشق لى يفرض على الإنسان يعيش بجوع (فهمت وما فهمت اللي سكن في داخله (فزّاع
فهمت العشق بحر أحلام غزير غزير بليّا قوع فهمته بحر أحلامي بحر عشقي بليّا قاع
فهمته نبض فهمته لمس فهمته روح ولا مسموع فهمت ان العشق فرصة عمر متخبّيٍ بِقْناع
قريته درس فهمته عِلْم أعيشه روح بنور شْموع بكيته دَمّ جرحته لا عرفت انّ الصراع صْراع
فهمته.. له قوانينٍ ولكنّه بلا ممنوع فهمته أصعب دْروبٍ مشيناها بلا مرجاع
فهمت ان العشق غصن الوعد في خافقي مزروع فهمته ملجأ الإحساس ولكنّه بَعَدْ ضيّاع
فهمت ان العشق أحيان يشبه فِ النزول طْلوع عيشه في اختلاف الوقت مثل ما تختلف الاصباع
فهمته جامع ويجمع وجمّعنا بلا مجموع بلا مرسى بلا مينا بلا شاطي وبلا مرباع
فهمته عالم الوحده شعارٍ رايع ومرفوع فهمته كوكبٍ ثاني.. يبيع الكلّ ما ينباع
فهمت العشق لى يطلب من الإنسان ذَرْف دْموع فهمت العشق لى يطلب من الإحساس كل أوجاع
فهمت العشق له أنواع وعشقي من فريد النوع (فهمت وما فهمت أَصْلاً وش اللى داخله (فَزَّاعْ )

ديـمــقــراطــي

تصدّق ما بقى له شيّ في باله من الأفكار عجز يخفيه في صدره كلام الحق ويلمّه
عجز يقطف ورود الفل ويظلم وردة النوّار لاجل ما يكسب الآذان يطري له ولد عمّه
إذا ما عاش ليله ليل ولا عاش النهار نهار ليا صبحه غدى ليله ونور الصبح مظلمّه
واذا ما عاش مستقبل يعيش اليوم بالتذكار يعيش الحاضر الماضي يهمّه بس ما يهمّه
يمقراطي يعبّر عن كلامه عاش باستقرار يومّ القلب لافكاره واذا ومّ الفكر ومّه
وانا ما جبتها لك سحب إلا في سما الأمطار سحابٍ لا بغى يمطر دموعه إندفق دمّه
سحابٍ من دموع الموت هالك يروي الأنهار روى نهره ونبت وردٍ عجز يقطف ولا يشمّه
جبل صامد قوى عزمه كبر حتى بدى ينهار عقب ما كان في العالي تهاوى من على القمّه
بدى يصـغر يالين أصبح حجر يلعب بيدين صغار تبعثر والطفل ينثر حصاه ويرجع يلمّه
نصيحه قلتها إحذر تعاكس جارف التيّار صعب تامّن في بحر الوقت لاموجه ولا يمّه
ونصيحه لا تذيكا لك على ناس اذكيا شطّار ترى بعض البشر تحسب بلا روح وبلا ذمّه
وانا لا ما عليّ الاّ أقول الحق مهما صار تريد الحق خذ قولي ولا تاخذ ولد عمّه
أنا قلت النصيحه لك واعيد الدار غير الدار وافاعيها تريّا بس لحظة غدر وتسمّه
أنا ما جبتها لك سحب إلاّ في سما الامطار واذا زمّ البحر موجه لك الله ردّها زمّه

الــجوااال

لا تــحــســـب ورود تــنــثــرلــك غــلــى و تــفــلـه
والـبـحـر عــشـريــن ونـجــومـه و ضــحـك هـلالــه
تـــعـــتـــقــــد إنــــي أنـــا مـــيــت و أنــــا لا و الله
أنــــا لا مـــــيـــت حـــبــــيــبــي لا و لا الله قـــالــه
لــي يــبــي يـقـرب خـفــوقـي مــا يـجــيــنـي بـزلـه
زلـــة أســمــحــلــهــا و مـــن عـــقــبـــهــا بـزوالــه
كــان عـــنـدك هـــرج بـــتــقــولــه لــقــلــبـي قـلـه
وش عــلــيـنـا بـهـرجـــة الــمــسـكـيـن والـلـي قـالـه
مــا عــرف شـــي فــي بـالـــي لا بـغـيـت أوصـلـه
يــــذكــر أســمـــي يــومـــهــا بــحـلـه و بـتـرحـالــه
مــن يـــحــب بــحـــب ضــايـــع قــلــت الله شــلـه
ضـــاع و الـــلــي ضــاع عـــنـدي احــتـيـاط بـدالــه
والله لـــحــذفــه أنـــا ويـــصــيــر حــرف الــعـلــه
يـالـيـن مـا يـضــحـك عـلـيـه إبـلـيـس قــبـل عـيـالــه
لــي مـسـج يـكـتـب فـي بـالـي و عـقـبـهـا أرســلـه
يــدخــل فـــشــاشــات حــبــه و يــنـحـرق جــوالـــه
مــــن خــــبـــالــه الــخـــبـــالـــه نـــيــــة نــاولـــه
و لا بـــغــيــتــه زيــد شـاف خـبــال غـيــر خـبـالــه
لـــرفــــعـــه وأرجــع أذلـــه و أرفـــعــــه وأذلـــه
لــيــن أســـمــع مـــرتــيــن بـــإذنــي يـاهــي حـالــه
لــو بــغــانــي هــو رقــالــي ولا أنــا مــا أنــزلـه
لا لـــه أنــــزل لا لــهُ و لا لألـــف مــن أشـــكــالـــه
ذه طــريــقــي مــن عــرفــتــك والـطـريـق تـدلـه
والــــطـــريـــق الـــلــي تـــدلــه لازم تــســـعــالــــه
خــذ مــن الــشــاعــر كــلامــه ولا حــبــه خــلـه
أنــــا أحــــبــــك لا حـبـيـبـــــي لا ولا الله قـــــالــــه

مما راق لي

 

[ريحانة بجيله]

قصائد رائعه


جزاك الله خير

وأحسن إليك فيما قدمت

دمت برضى الله وإحسانه وفضله ​