اشكرك ياابو راكان على الموضوع وكل ما له علاقه بالماضي يستهويني على الرغم اني لا اتمنى ان تعود تلك الايام
انا عشت طفولتي في الديره وكنت غالبا اسرح مع الحريم الكبار احيان هم يدعوني واحنا سارحين لابد ان أسالهم عن الاشجار والنباتات واساميها الاغلبيه يتجاوبون معي والبعض يزعل على اني كنت صغيره ومااعرف اساميها صدق بس هم يقارنون بيني ايامهم وايامي على بالهم انه دلع والحين لو سالنا الشيبان ماعرفوا حبه عموما كانت في البلاد المسقويه اذا واحده سرحت تعتلف نحصل بين الحبش والدجر والصفراء نباتات تنوكل مثل الحسيكل هذا ثماره صغيره على شكل قلب ياكلونها وفي الصُفح نبات اسمه دُراج وهو يشبه ثمره للفاوصوليه الا انه اصغر واحلى حالي جدا والخطره والبعض يسميها لوحيه تتشابه حتى بس فيه فرق بين حقت الناس وحقت البساس ^_^ زي الفرق بين زيدة الناس وزيدة الجمال لان حقت الناس صغيره وشكلها مرتب وحقت الحيوانات اكركم الله كبيره سيقانها وطويله وشكلها ماهو حلو
فيه برضه نباتات عطريه تجي في الجبل مثل ريحان البنات وبعيثران الجبل هو كذا اسمه لانه يشبه للبعيثران الي نغرسه الا ان ريحته احلى احيان ياخذونها وياخذون معها شيح وشيعه وسذاب ويدقونها ويحطون عليها عفار لونه رمادي فيه رغوه ويغسلون بها الملابس زي بونكس ثلاثه في واحد 
كنا اذا بدينا من الباب والا والدنيا تزهر ^_^ والله ما كأنها في السعوديه لان الدنيا خطراء الارضيه والاشجار الكبيره ملونه زي اللوز ازهاره بيضا وفيه نباتات صغيره زي العصيفر لون زهره اصفر والزاهر لونه موف والقميعا هذي نقشرها ويكون فيها زي الغشاء الخفيف ننفخه ويطلع لها صوت صفير قوي مره بعد ثواني تضمر على انها راويه جدا احيان اذا واحد نحف ومرض يقلون كما القميعا لانها روايه وبعد لحظات تكون ميته وذبلانه وفيه نبته اسمها الزقوم ماادري اذا احد يعرفها اول مااحد يشوف زهرتها يطيح عندها من جمال شكلها خصوصا زمان ماكان الناس كثير الي معهم ورد بس ريحتها سيئه ويمكن الاسم جايي من كذا وفيه البرحا على شكل ورده بس يقلون اذا احد مسكها ومسح عينه يجيه عمى حتى الشوك فيه ورود بنفسجيه على العموم الألوان مختلفه وجميله
انا كنت اسمع ان زمان الناس يخرجون يغسلون فرشهم برا بالوديان وينشرونها بالشمس على الصفيان وكل يوم عايله تروح وكانوا ايام البيوت القديمه الي عاشوا ببيوت قديمه يتجمعون اذا جا مطر عند بيت الكبير فيهم ويتسوون قرفه لانها تدفي وكل واحد يجيب طبيخته معه وهي عباره عن الحبش والدجر اليابس يطبخونه في مويه وملح ويحطون عليه قبل لا يخلص عجينه زي الدغابيس وياكلونه وفي بداية الحبش والدجر يطبخونه وهو زي مانقول طازج والحبش احيان يسوونه(مليله ) يشبون قبس ولما تجمر يحطونه عليها لانها اذا كانت باقي نار تحرقه بدون ما يستوي من جوا بس اذا كان فحم ياخذ وقت ويطلع طمعه حلو احيان ينباع في اماكن كثيره الحين بس ماهو زي حق الديره ابد والبقل تكلمت عنه هو والصقله في موضوع مستقل بالنسبه للمطرحه مااعرفها الا هنيه لان نحن نسميه طبيخة دجر حبش ودغابيس والبعض يسمهيا دلابس هذا بقريه ثانيه غير عندنا المسميات تختلف وان كان بعضها اقرب للصواب
الغنم اذا كان المطر ليليه يربطون لها عثرب في كُلاب وهو زي الثريا معلق في السقف يطلّعون به الدلو اذا طاح في البير لان له قوايم منحنيه تسحب الطايح انا حقيقة مااعرف شكله بس اعتقد انه يشبه لشكل النخله معكوسه على ما فهمت طبعا هو صغير جدا ولاتخرج الغنم علاشان لا تصرد معنى الصرد انها تموت من البرد ومهما يحاولون مايقدرون ينقذونها
الحين فيه ناس ياخذون لغنمهم دفايات
وحتى الناس يمرضون يجيهم امراض مميته مثل الجنب هذا من البرد الشديد وقل من سلم منه زمااان على عصر الاجداد والزكام وغيرها .
من ذكرياتي في ايام المطر والربيع
كنت مره لابسه ملابس كثيييره وكأني فيل على اني نحيفه ومدري وش خالفت به وجت امي تظربني بمطرق سواسي حتى السواسي فيه ورده صغيره ياكلونهابس السواسي حق الضرب يابس ومفتول دخلت ايدي ورجولي تحت الملابس وهي تظربني وانا اضحك وتتحمى وانا اضحك الين قهرت قالت اووه قهرت ولا فيك بصيره قلت ما يتعبني ما يوصل لجمسي ^_^ لو كان سكت ماكان درت
وبمره ثانيه كانت واحده من الحريم وهي سارحه بغنمها تدعيني ونروح مع بعض وتعلمني بقصص وحكايا ويوم جا المطر وفيه وادي بيننا وبين القريه حقتنا وراحت هي تبغى تودي غنها تحت شجره وانا خفت ورحت البيت بسرعه وهي ماتدري عني المهم اني بعدما خلص المطر جات تبكي تتوقع المطر سحبني ويوم شافتني ابنسطت وسلمت عليه على بالها بسلم سويت اني فيني خير وشفت ان غمنها ورا الوادي وحبيت اني اسعدها احس نفسي كبيره مره وراعية واجب واتعامل واتكلم زي الكبار اذا تذكرت اخجل من نفسي والمشكله كانو ا يشجعوني على ذالحركات ولهذا مااتهنيت بالطفوله كنت احس بمسؤوليه من لاشي واني مهمه مكبره المواضع يعني المهم يوم جيت اقطع الودي سحبني السيل والله ماقدرت اقاوم لانه فعلا قوي وجلست اتفرج وساكته شويه وانا صاكه في صخره ملساء وما قدرت امسكها ومن الجهه الثانيه وراها ناس انقذوني والا كان رحت فيها هذا كله وانا يمكن في سنه ثالثه او رابعه احب المغامرات
البوسن مره كان عندنا واحد من الجماعه حرث بلاده كلها بوسن وهو اخضر شكله ماهو زي يوم يبس وجا ناس اجانب ادرنيني اظن يشوفون وما حصلوا الا انا وورعان صغار وسألونا قالوا هذا عدس ؟؟ قلنا لا وجالسين يطالعون زين قالوا الا هذا عدس ونحن نحلف ونولف انه بوسن ماهو عدس ظللنا هم ^_^ بس ماكنا ندري ما نشوف العدس الا في كيس ماقد شفناه اخضر .
مااردي مافيه احد قد بدل المليله ببسي ؟؟ يعني نسوي حبشه واحده بلعبة ببسي (أتستبدلون الذي هو ادنى بالذي هو خير )؟
هذي بعض ذكرياتي باقي ان اقول لكم انا في الجزء الاول من العشرينات ولكن لحقت على كل هذي الاشياء وزياده اما الي فوق ال 25 وينكر الله يعينه الا اذا كان ماعاش هناك ولا نعفيه من معرفة ماضيه باي حال من الاحوال .
شكرا لك اخوي ابو راكان الدهيسي وان شاء الله اكون اضفت شي بسيط للموضوع
هلا بك تاج الوفا
ماشاء الله عليك انتي مرجع لنا في بعض المصطلحات التي مرعليها
ازمان ولم يعد البعظ يذكرالكثير منها
أختي جميل أن يكون بيننا من يتذكر تلك السنين ويسترجع ماضيه
بما فيه من ذكريات ومواقف مر بها
وأنا مررت بالكثير من تلك المواقف ولكن إذا لم يكن هناك مواقف
أو مناسبات لإسترجاع مامضى ستتتناسا بما فيها من ذكريات
أختي الكريمه اكرر شكري وتقديري لك على مابذلتيه من جهد
عبرهذا المتصفح ... دمتي لنا ودام تواجدك الأكثر رمن رائع
